近來好多人問我點解我咁慳，其實原來我喺好多人眼中係好慳，但真正老實講，我確係唔多覺。可能我細個窮慣左，我根本都唔覺得一回事。
以下係好多人問我點解唔對自己好D，話要我買嘅嘢，我逐一講下我嘅感覺：
車：我對車無興趣，我連型號、CC乜都唔識。但我有好多車牌，就只欠電單車同拖頭。我之前有揸開車，但後來無用了，因為我發現坐的士好舒服，唔洗搵位，又方便。如果我真係想揸車，我諗我會租架的士用下，又可以做生意，又可以自己用，最緊要入氣，夠抵用，唔錯。
樓：住村屋嘅原因係因為我有兩隻狗。同埋以前我都住屋苑三房單位，我唔覺有乜特別。會所永遠唔用、屋企大、要拎嘢重遠過乜，同埋我來來去去都係得幾個地方用：電腦、廁所同床，衰D講我係可以住套房果種人嚟，同埋細個時130呎公屋住6個人我都試過，而家住咁大，我真係覺得好舒服了。同埋如果兩隻嘢香左，我一定世界各地周圍走，同埋搬翻大陸住了。
服飾：麻甩佬一名，我D衫好多著10年以上，無穿無爛，我諗唔到點解要買要換。同埋著衫係應該人著衫，唔係衫著你，我都曾經鐘意過名牌，但果時反而係我最窮嘅時間，原來一個人無自信時，可能反而會更著重用名牌去建立自己自信。但而家相反地，我真係唔介意人地點睇我，因為我對名牌呢樣嘢真係無咗追求嘅意欲。
食：我早餐好多時茶記、中午就茶樓、晚上有時自己煮，有時出去食。我又真係諗唔到洗得幾錢，一日幾佰，頂盡晒。年紀大咗，你叫我日日大魚大肉我都食唔落。同埋兩個人食，晚上都係兩三個餸，好夠。餐餐大魚大肉先唔講我頂唔頂到，就算頂到對身體都唔係好，咁點解要做。
上面所講，衣食住行四樣嘢，原來我都無乜所求，應該可以死得，哈哈。其實我以前亦曾試過幾年夜夜笙歌，玩完過後一Pat爛醉，頭痛幾日。玩時好開心，但玩完仍然是有一種空虛感。但當然仍然有D壞習慣難改，亦重有一D小人刺激下我，因為無左呢D嘢，我諗都開始可以同死神對話了。錢，我仍然係好鐘意，我貪財係老實話，但我賺得心安。42了，俾我貪多陣喇，連錢都唔貪，就真係果頭近o架喇。
其實財務自由好難？我覺得係你去到人生另一個階段時，我會覺得個人睇得通透咗，反而越來越容易，所以先唔好執著於一定要幾歲幾歲去財自，有時你自行會做得到。
P.S. 睇完上面一大堆嘢，係咪好有啟發性？香港人，醒喇，我憑乜野可以講上面堆野，就係憑我張相嘅房產證呀，快D努力D搵錢喇，如果唔係你到42歲就會PM我俾人雞左，問我點算o架喇。星期一記住起床翻工呀!!!!!
原文：
https://www.yip-sir.com/blog/_%E8%B2%A1%E5%8B%99%E8%87%AA%E7%94%B1
